എസ്‌ ഐ ഒ യുടെ കപടസമരം

വിദ്യാഭ്യാസരംഗത്തെ മലബാർ അവഗണനക്കെതിരെ എസ്‌ ഐ ഒ ക്കാർ സംസ്ഥാന ജാഥ നടത്തുകയാണല്ലോ.മലബാർ അവഗണനയും അലീഗഡ്‌ കാമ്പസ്സും ഒക്കെയാണ്‌ എസ്‌ ഐ ഒ,സോളിഡാരിറ്റി, ജമാ-അത്താദികൾക്ക്‌ ഇപ്പോൾ വിദ്യാഭ്യാസ രംഗത്തെ വലിയ പ്രശ്നം.
സ്വാശ്രയകരാറിനെക്കുറിച്ച്‌ എന്താണവർക്ക്‌ പറയാനുള്ളത്‌? അതിനെതിരെ സമരവും പ്രചരണവും ഒന്നും ഇല്ലേ? ഇടതു സർക്കാർ കൊണ്ടുവന്ന സ്വാശ്രയ നിയമം പരാജയപ്പെട്ടപ്പോൾ വിദ്യാഭ്യാസ മന്ത്രി വഞ്ചന കാട്ടി എന്ന് പറഞ്ഞവർ ഇപ്പോൾ എന്തു പറയുന്നു ആവോ.
സ്വാശ്രയത്തിനും സ്വകാര്യവിദ്യാഭ്യാസത്തിനുമെല്ലാം എതിരെ പറയാൻ തങ്ങൾക്ക്‌ ധാർമ്മികാവകാശമില്ല എന്നത്‌ അവർക്കറിയാം. സ്വാശ്രയത്തിൻ എതിരെ പറഞ്ഞാലും അനുകൂലിച്ചു പറഞ്ഞാലും എസ്‌ ഐ ഒ വിൽ അണിചേർന്ന വിദ്യാർത്ഥികൾ ചോദ്യം ഉന്നയിക്കാൻ സാധ്യതയുണ്ട്‌. അതിനൊക്കെ മറുപടി പറയാൻ തുനിഞ്ഞാൽ കുഴയുകയേ ഉള്ളൂ.

അതിൽ നിന്ന് രക്ഷപ്പെടാൻ നേതൃത്വം കണ്ടെത്തിയ ഉപായമാണ്‌ മലബാർ അവഗണനക്കെതിരെ വിദ്യാർത്ഥി അണികളെക്കൊണ്ടുള്ള ഈ സമരം ചെയ്യിക്കൽ.കുട്ടിക്കുരങ്ങന്മാരെക്കൊണ്ട്‌ ചുടുചോര മാന്തിക്കുന്ന പണി ജമാ-അത്തുകാരും തുടങ്ങിയതിന്റെ സൂചനയായി വേണം ഇതിനെ കണക്കാക്കാൻ.മലബാർ അവഗണനക്കെതിരെ എന്ന പേരിൽ സമരം ചെയ്യിച്ച്‌ പോലീസുകാരുടെ അടി മേടിക്കാൻ പിള്ളാരെ വിടേണ്ട വല്ല കാര്യവുമുണ്ടോ.

നാട്ടിൽ പലയിടത്തും സ്വകാര്യ സ്കൂളുകൾ നടത്തി പൊതു വിദ്യാഭ്യാസത്തിനു കോടാലി വെക്കുന്നവരിൽ ജമാ-അത്തുകാരും ഉണ്ടല്ലോ.അവർ പാവം വിദ്യാർത്ഥി അണികളെ പോലീസിന്റെ ലാത്തിയടി കൊള്ളാൻ പറഞ്ഞുവിടുന്നത്‌ തികഞ്ഞ വഞ്ചനയല്ലേ? അതിനാൽ വിദ്യാർത്ഥികളുടെ ശ്രദ്ധയേ മറ്റു വിഷയങ്ങളിലേക്ക്‌ തിരിച്ചു വിട്ട്‌ അതിന്റെ പേരിൽ സമരാവേശം ഉണ്ടാക്കാനാണു എസ്‌ ഐ ഒ നേതൃത്വം ഇപ്പോഴത്തെ സമരങ്ങൾ ആസൂത്രണം ചെയ്തിരിക്കുന്നത്‌.

അംഗീകാരമില്ലാത്ത അൺ എയ്ഡഡ്‌ വിദ്യാലയങ്ങളെ നടത്താൻ അനുവദിക്കണോ വേണ്ടേ? എന്താണ്‌ എസ്‌ ഐ ഒ യുടെ ഈ കാര്യത്തിലുള്ള അഭിപ്രായം? ഇവക്ക്‌ ഭാവിയിൽ അംഗീകാരം കൊടുക്കണോ വേണ്ടേ? അവയെ ക്രമേണ ഇല്ലായ്മ ചെയ്യുന്നതിനെക്കുറിച്ച്‌ എന്താണ്‌ അഭിപ്രായം?

ജമാ-അത്തുകാർ നടത്തുന്നതും അല്ലാത്തതുമായ അംഗീകൃത, അനംഗീകൃത സ്കൂളുകളിൽ പഠിക്കുന്നവരും പഠിച്ചവരും ആയവർ എസ്‌ ഐ ഒ വിൽ നല്ലൊരു ശതമാനം ഉണ്ടാവുമല്ലോ.അവരൊക്കെ നിയന്ത്രിക്കുന്ന എസ്‌ ഐ ഒവിൽ നിന്ന് വിപ്ലവകരമായ നിലപാട്‌ പ്രതീക്ഷിക്കാമോ?

സർക്കാർ സ്കൂളിനു കെട്ടിടം പണിതു കൊടുക്കുക പോലുള്ള ദാനപ്രവൃത്തികൾ നടത്തി തങ്ങളുടെ കുറ്റബോധം തീർക്കാൻ ശ്രമിക്കുന്നത്‌ നന്ന്. ഇത്തരം ദാനപ്രവൃത്തികൾ നടത്താൻ ആസ്തിയുള്ള ഏക 'നവസാമൂഹിക' പ്രസ്ഥാനം കേരളത്തിൽ ജമാ-അത്ത്‌ മാത്രമായിരിക്കും.

കള്ളക്കടത്തുകാരും ആൾ ദൈവങ്ങളും ജീവകാരുണ്യപ്രവർത്തനങ്ങൾ നടത്തുന്നതിൽ നിന്നും ഇതിനു വല്ല വ്യത്യാസവുമുണ്ടോ?
ഒരു ഭാഗത്ത്‌ പൊതു വിദ്യാഭ്യാസത്തിനു പാര പണിത്‌ കൊണ്ട്‌, വിദ്യാഭ്യാസക്കച്ചവടം നടത്തി തങ്ങളുടെ സ്ഥാപനങ്ങളുടെ ആസ്തി വർദ്ധിപ്പിക്കുക.മറുഭാഗത്ത്‌ പൊതു വിദ്യാഭ്യാസത്തിനായി ദാനങ്ങൾ നടത്തുക. അങ്ങനെ ഇവരുടെയൊക്കെ 'ചക്കാത്ത്‌' കൊണ്ട്‌ നിലനിർത്തേണ്ട ഒന്നായി പൊതുവിദ്യാഭ്യാസത്തെ മാറ്റുക.

ഇവരുടെ 'ചക്കാത്ത്‌' കേരളത്തിലെ നവസാമൂഹിക പ്രസ്ഥാനങ്ങളുടെ ഇടങ്ങളെയും അവ സാധ്യമാക്കുന്ന ബഹുസ്വരതയേയും ക്രമേണ വിഴുങ്ങുമെന്ന് തീർച്ചാണ്‌. മുസ്ലിം സമുദായത്തിനകത്ത്‌ ബഹുസ്വരത എന്നതിന്‌ പര്യായമാകാനാണ്‌ ഇവർ ശ്രമിക്കുന്നത്‌.ഇവരുടെ ബഹുസ്വരത പുരോഗമനത്തിന്റെയും നവജനാധിപത്യത്തിന്റെയും നാമ്പുകളെ ശ്വാസം മുട്ടിച്ച്‌ കൊല്ലൽ മാത്രമാണ്‌.
വാക്കുകളെ ഹൈജാക്ക്‌ ചെയ്ത്‌ യുവാക്കളെയും വിദ്യാർത്ഥികളെയും ആകർഷിക്കുന്ന തന്ത്രം നവജനാധിപത്യവാദികൾ തിരിച്ചറിയണം.ജമാ-അത്തിന്റെ ഭരണഘടനയും പോളിസി- പ്രോഗ്രാമും ഒന്നു വായിക്കുക. അതിൽ എവിടെ ജനാധിപത്യം?എവിടെ ബഹുസ്വരത?